Verdriet is nou geskeduleer. Jaarliks. Vir altyd. Môre is dit juis weer so - dis haar verjaarsdag. Nico, ons Evangeliebedienaar, beskryf dit as die hartseerste besoek wat hy in meer as tien jaar aan 'n seeman gebring het.

Oor 'n koppie koffie en 'n doughnut, vertel die kok sy verhaal. Trane loop vrylik, asof hy lankal ophou probeer het om 'n wal daarvoor te bou. Februarie is maar sommer nou die dag. Die telefoonoproep wat alles onherroeplik verander het speel op herhaal, oor-en-oor in sy gemoed. Sy was maar sewe-en-veertig jaar jonk. Te jonk. Haar hart het sommer net gaan staan – ophou lewe.  Sy prinses ... 

By die huis is daar drie kinders. Drie kinders wat nie verdien om sonder 'n ma deur die lewe te gaan nie. Die jongste is 'n seun van elf - sy ma se oogappel. Vanaf haar dood vreet die vrees sy vrede en snags huil hy onbedaarlik en moet die sagte hande van sy ouma hom nou gereeld uit nagmerries uit wakkermaak.

En Francesco, hy sit duisende kilometer ver van dit alles aan boord 'n skip.  En die verwyt vreet onophoudelik.

Met sy laaste vakansie was hy twaalf dae by die huis toe die foon lui en 'n maatskappy hom 'n nuwe nege maande kontrak aanbied.  Sy vrou het by hom gesmeek om eerder sy drie maande verlof soos beplan te neem. Maar geld groei nie aan bome nie - hy is die enigste broodwinner in die familie - en daarom is hy op die dertiende dag weg. Sy het dit op haar saggeaarde, stil manier so aanvaar.

Die Christelike Seemansorganisasie dra God se liefde en God se Woord na elke seeman toe in sy eie taal.

Nico sit met Francesco se hande in sy eie. Hul soek vertroosting uit die Woord. Bid saam. Huil saam. Want niemand anders aan boord sal dit doen nie.  As Nico skip-af verdwyn druk Francesco die splinternuwe Bybel in sy eie taal teen sy bors met die wete dat hy daarin vertroosting sal kry.

Seemanne en die skepe waarop hulle dien, dryf 90% van alle wêreldhandel. Hulle waag hulle lewens vir ons elke dag. Ons as 'n interkerklike sendingorganisasie glo dat ons vir elke gewillige seeman 'n Bybel in sy eie taal moet gee en hulle met die genade en liefde van Christus moet versorg. Ons bedien sedert 1944 duisende seemanne in ongeveer 106 tale in die vyf grootste hawens van Suid-Afrika.

SMS cso na 42030 om R30 te skenk (admin en selfoonkostes geld) of maak 'n aanlyn donasie. Vir ander maniere hoe jy ons kan ondersteun, kliek hier.

Jou donasie is ontsaglik baie werd en sal hierdie Koninkrykswerk laat voortgaan sodat die Evangelie na die uithoeke van die aarde sal gaan.